ዝነኛው ሙዚቀኛ አሊ ቢራ በ75 ዓመቱ ከዚህ ዓለም በሞት ተለየ

ለበርካታ አስርት ዓመታት በሙዚቃው ዘርፍ ታዋቂነትንና ተወዳጅነትን ያተረፈው አሊ መሐመድ ቢራ በ75 ዓመቱ ማረፉን የኦሮሚያ ክልል ኮሙኒኬሽን ገለጸ። 

በኦሮሞ ሕዝብ የኪነ ጥበብ እድገት ውስጥ ትልቅ አሻራ ማሳረፉ የሚነገርለት ድምጻዊ አሊ ቢራ በርካታ ዘመን ተሻጋሪ ሙዚቃዎችን አበርክቷል።  

ግንቦት 1940 ዓ.ም በድሬ ዳዋ ከተማ የተወለደው አሊ ቢራ በኦሮሚኛ ቋንቋ ያቀነቀናቸው ሙዚቃዎች ከኦሮሚያ ተሻግረው  ቋንቋውን ከሚናገረው ሕብረተሰብ ባሻገርም እጅግ በበርካቶች ተወዳጅነትን አትርፈዋል። 

አሊ ቢራ ከኦሮምኛ በተጨማሪ በአማርኛ እና በሶማሊኛ ቋንቋዎች ተወዳጅነትን ያተረፉ በአጠቃላይ 260 ሙዚቃዎችን ተጫውቷል። 

ሁለገቡ የሙዚቃ ሰው አሊ ቢራ ተወዳጅ ሙዚቃዎችን ከመዝፈን በተጨማሪ ግጥምና ዜማዎችን በመፍጠር የሚታወቅ ሲሆን፣ ባለፉት ዓመታት የእራሱንና ከሌሎች ሙዚቀኞች ጋር በመሆን አዳዲስ ሥራዎችን ማቅረቡ ይታወቃል።  

አሊ ቢራ ባጋጠመው የስኳርና የልብ የጤና ችግር ምክንያት የሕክምና ድጋፍ ሲደረግለት ቢቆይም ዛሬ ጥቅምት 27 ቀን 2015 ዓ.ም  ሕይወቱ እንዳለፈ ታውቋል።