ጋዜጠኛ አልዓዛር ተረፈ ከሁለት ሳምንት እስር በኋላ ተፈታ

የተባበሩት አረብ ኤምሬቶች መገናኛ ብዙሃን "አል ዐይን ኒውስ " በዘጋቢነት የሚሰራው ጋዜጠኛ አልዓዛር ተረፈ ከእስር ከተፈታ በኋላ ቤተሰቦቹ ጋር ተገናኝቷል። ድምፅ ለሆኑትም ምስጋናዉን አቅርቧል። 

አልዓዛር ሐሙስ ሐምሌ 7 ከሰዓት ሲቪል በለበሱ ጸጥታ ኃይሎች መያዙን ባለቤቱ እና ባልደረባው ተናግረዋል እንደነበር አይዘነጋም። 

በወቅቱ ጋዜጠኛው በጸጥታ አካላት ከተያዘ በኋላ በአዲስ አበባ ላምበረት አካባቢ ወደሚገኝ ፖሊስ ጣቢያ መወሰዱንም አመልክተው እንደነበር ይታወሳል። 

ጋዜጠኛው የተያዘው ላምበረት መናኸሪያ አካባቢ ከሚገኝ ካፌ እንደሆነ ገልጿል። 

የሲቪል ልብስ የለበሱ ሁለት ግለሰቦች ጋዜጠኛውን መታወቂያ እንዲያሳያቸው እንደጠየቁት እና  " እንፈልግሃለን " ብለው እንደወሰዱት የዓይን እማኞች ተናግረዋል። 

ሁለቱ ግለሰቦች አልዓዛርን በያዙበት ወቅት " ለችግኝ ተከላ ጥሩ አመለካከት የለህም፤ ‘ቤተ መንግስት ገብተን፤ በደም የበቀለውን ችግኝ እንነቅላለን’ ብለሃል " በሚል ሲወነጅሉት መሰማታቸውን ጋዜጠኛ ዳዊት መናገሩን በወቅቱ ተገልፆ ነበር። 

" አል ዓይን ኒውስ " የተባበሩት አረብ ኤምሬቶች መገናኛ ብዙሃን ሲሆን በአማርኛ አገልግሎት ክፍሉ በኩል በተለይ የውጭ ሀገር መረጃዎችን እንዲሁም የሀገር ውስጥ መረጃዎችን በማቅረብ ይታወቃል። 

ኢትዮጵያ ጋዜጠኞችንና የመገናኛ ብዙሃን ባለሙያዎችን በስፋት በማሰር ስሟ ተደጋግሞ እየተነሳ ነው።